શ્રી લાલભાઈ દલપતભાઇ ઇન્સ્ટિટ્યૂટ ઑફ ઇણ્ડોલૉજી, શૈક્ષણિક તેમજ સંશોધન ક્ષેત્રની અનેક પ્રવૃત્તિઓનું આયોજન કરતી રહેલી સંસ્થા છે. વ્યાખ્યાન શ્રેણી “સંગોષ્ટિ”ના માધ્યમથી દેશના તેમજ વિદેશના અનેક ગણમાન્ય વિદ્વાનોનાં વ્યાખ્યાનો અહીં સમયાંતરે થતાં રહેલાં છે. પ્રતિવર્ષ લગભગ ૨૦ જેટલાં વ્યાખ્યાનો આ વ્યાખ્યાનમાળામાં યોજાતાં રહ્યાં છે. આ ઉપરાંત ઇન્સ્ટિટ્યૂટમાં પ્રાચ્યવિદ્યા સંબંધિત અનેક વ્યાખ્યાન, પરિસંવાદ, સંગોષ્ટિ, પ્રદર્શન ઇત્યાદિનું આયોજન સમયાંતરે થતુ રહે છે. રાષ્ટ્રીય પાણ્ડુલિપિ મિશનના સહયોગથી હસ્તપ્રતવિજ્ઞાન તથા લિપિવિજ્ઞાન વિષય પર ૨૧ દિવસની તથા ૪૦ દિવસની કાર્યશાળાઓનું આયોજન થયેલું છે. 

અનેક આદરણીય વિદ્વાનોએ “લાલભાઈ દલપતભાઈ વ્યાખ્યાનમાળા” તથા “આગમ પ્રભાકર મુનિશ્રી પુણ્યવિજયજી વ્યાખ્યાન માળા”માં તેમનાં મનનીય વ્યાખ્યાનો આપ્યાં છે. તેમાંના કેટલાક મહાનુભાવોનું સ્મરણ કરીએ તો તે આ મુજબ છે. ડૉ. જી. સી. પાણ્ડે, પ્રો. એસ. આર. બેનર્જી, મુનિશ્રી શીલચંદ્ર વિજયજી, ડૉ. ટી. એસ. નાન્દી, ડૉ. વસન્તકુમાર ભટ્ટ, ડૉ. ગૌતમ પટેલ, ડૉ. કાલિદાસ ભટ્ટાચાર્ય, ડૉ. મઇનકર, ડૉ. બી. કે. માતીલાલ, શ્રી સી. શિવરામમૂર્તિ, ડૉ. ટી. જી. કલઘટગી ઇત્યાદિ.