આંતરરાષ્ટ્રીય ખ્યાતિ પ્રાપ્ત શ્રી લાલભાઈ દલપતભાઈ ઇન્સ્ટિટ્યૂટ ઑફ ઇણ્ડોલૉજી સંસ્થા, અમદાવાદ શહેરના પશ્ચિમે નવરંગપુરા વિસ્તારમાં આવેલી છે. આ વિસ્તારમાં ગુજરાત યુનિવર્સિટી, એલ. ડી. એંજિનીયરિંગ, ભૌતિક અનુસંધાન કેન્દ્ર(પી.આર.એલ) જેવી અનેક વિખ્યાત શૈક્ષણિક તથા સંશોધન સંસ્થાઓ આવેલી છે. આવી મનનીય સંસ્થાઓની વચ્ચે વિશાળ તથા કુદરતી સૌંદર્યથી રમણીય એવા પરિસરમાં આ સંસ્થા સ્થિત છે. ગુજરાત યુનિવર્સિટીના મુખ્ય માર્ગને સ્પર્શતી આ સંસ્થા અમદાવાદ રેલ્વે સ્ટેશનથી ૭ કિલોમીટરે તથા અમદાવાદના મધ્યસ્થ બસ સ્ટેશન એવા ગીત મંદિરથી ૬ કિલોમીટરના અંતરે છે. આંતરરાષ્ટ્રીય હવાઇ મથકથી આ સંસ્થા ૧૨ કિલોમીટરના અંતરે આવેલી છે.

 
મુલાકાતનો સમય સવારે ૧૦:૩0 થી સાંજે ૬:00 સુધી રહેશે. સંસ્થા સપ્તાહના રવિવારે તથા જાહેર રજાના દિવસોમાં બંધ રહેશે.

શૈક્ષણિત મુલાકાત

આપની શાળા, કૉલેજ કે ઇન્સ્ટિટ્યૂટના વિદ્યાર્થીઓ સાથે સંગ્રહાલયની મુલાકાત એ વાસ્તવમાં સુખદ અનુભવ રહેશે. આપના વિદ્યાર્થીઓને આપણા ઇતિહાસ, સંસ્કૃતિ અને વારસા સાથે જોડાવાનો આ ઉત્તમ માર્ગ સિદ્ધ થશે. શૈક્ષણિક મુલાકાત માટે માર્ગદર્શક ઉપલબ્ધ રહેશે. માટે આપની મુલાકાતનો સમયાવધિ પહેલેથી નિર્ધારિત કરવા અનુરોધ છે. જેમાં કેટલી સંખ્યામાં વિદ્યાર્થીઓ તથા વયસ્ક રહેશે તથા આ દરમ્યાન આપની શું વિશેષ અપેક્ષા છે તે વિષયમાં પણ પહેલેથી જાણકારી આપવી જરૂરી રહેશે. જો કોઇ અનિવાર્ય સંજોગેને કારણે પ્રવાસ અશક્ય હોય તો અમને અગાઉથી જણાવી દેશો.